Disculpa, pero esta entrada está disponible sólo en gallego. For the sake of viewer convenience, the content is shown below in the alternative language. You may click the link to switch the active language.
Presentouse a nova edición do Festival Sinsal Son Estrella Galicia, que se celebrará do 22 ao 24 de xullo na Illa de San Simón (Redondela). O acto tivo lugar no espazo de Estrella Galicia en Vigo e contou coa presenza dos principais patrocinadores do festival: Son Estrella Galicia, New Balance, Consellería de Cultura da Xunta de Galicia, Deputación de Pontevedra e concello de Redondela.
Victor Mantiñán, de Estrella Galicia, actuou como anfitrión e mestre de cerimonias destacando o papel do festival Sinsal como “prescriptor musical, cazador de talentos, un dos festivais que mellor encarna os valores da nosa marca”. O Festival Sinsal Son Estrella Galicia acadou en 2015 o Premio Fest ao Mellor Festival de Formato Pequeño de España. Xulio Gómez, codirector do Festival Sinsal Son Estrella Galicia xunto a Luis Campos, destacou o traballo desenvolvido durante todo o ano con eventos promocionais en Madrid, as sesións anecoicas na Escola de Telecomunicacións da Universidade de Vigo ou a campaña #RíasBaixasFests promovida desde a Deputación.
O orzamento do Festival Sinsal Son Estrella Galicia en 2016 é de aproximadamente 150.000 euros. Destacou o codirector do Festival Sinsal Son Estrella Galicia Xuliio Gómez o equilibrio no financiamento do festival entre patrocinio privado, institucional e ingresos propios, “prácticamente ao 30% en cada un deses capítulos”. Un 35% de orzamento destínase a cachés artísticos e un 45% a produción. En 2016 a organización do festival asinou un convenio con ADAMI, a axencia francesa para xóvenes talentos musicais.
Sinsal Son Estrella Galicia é un evento único en Europa en concepto e forma. “Non somos un festival indie nin de músicas do mundo, nin de jazz…A nosa identidade é ofrecer en San Simón concertos para todos os gustos. Haberá moitas propostas instrumentais pero tamén unha representación interesante dos novos xograres do século vinte e un. O 90% dos artistas estarán presentes nos mellores festivais de España e Portugal como o Grec de Barcelona, o Jazzaldia de Donostia, La Mar de Músicas de Cartaxena ou Sines”, explicou Xulio Gómez.
“Este ano contaremos con dezanove artistas diferentes e procedentes de Espña, Portugal, Francia, Reino Unido, Lituania, Exipto, Zimbabwe, EUA, Canadá, Chile, Brasil e Arxentina. Haberá tres escenarios: o Son Estrella Galicia, o New Balance e o Paseo dos Buxos.
Mulleres no festival
Sen desvelar o cartel, como é norma do festival, Xulio Gómez destacou a relevancia das mulleres un ano máis na nova edición de Sinsal Son Estrella Galicia. Neste sentido o festival traballa en colaboración coa Unidade de Igualdade da Universidade de Vigo para visibilizar a creación musical feminina na actualidade. “Este ano contaremos con varias artistas que son e serán referencia da música internacional”, di Gómez.
Neste momento as entradas para o festival na xornada de sábado 23 de xullo están esgotadas, así como todos os abonos e as entradas de menores a prezo especial de domingo. Quedan á venda ao redor de 150 entradas para o venres 22 e 100 para o domingo 24, á venda na plataforma ticketea. Entre as novedades, a goleta fletada desde Vigo o sábado, cuxas pasaxes xa están esgotadas, pero que estará fondeada na Illa de San Simón durante á xornada para ofrecer paseos pola enseada ao público dese día. Tamén está esgotado o pack camping en colaboración co camping Cesantes.
Apoio institucional
Mentres Pablo Tojeiro de New Balance subliñou a complicidade entre a marca e o festival, Xabier Alonso, concelleiro de Cultura de Redondela, destacou as orixes do festival na illa e a importancia que ten para a vila a celebración do evento. O secretario xeral de Cultura da Xunta de Galicia, Anxo Lorenzo, sinalou que se ben Galicia precisa de festivais masivos, “o modelo San Simón é moi necesario, vinculado a valores de sustentabilidade, familiares, ao territorio”. Lorenzo mostrou o orgullo institucional de contar cun festival coma este. “Queremos que sigades. Sabemos das limitacións, pero tamén sabemos que esas limitacións contribúen en boa medida ao atractivo do festival”, dixo.
Foi a presidenta da Deputación, Carmela Silva, a encargada de pechar a rolda de prensa e o fixo cun alegato a favor dos valores culturais e sociais das Rías Baixas e da música. “Vivimos nun área que é cultura, historia, lingua, ideas, capacidade de innovar, etc. E todos eses valores son Sinsal Son Estrella Galicia”, comentou reafirmando a necesidade de promoción conxunta co exemplo da campaña dos Festivais Rías Baixas. Carmela Silva que anunciou que en 2016 ela estará na illa de San Simón ensalzou o papel da música na vida cotiá e das “loucuras, sen elas non nacerían proxectos que logo se converten en referencias internacionais coma este”.