Un abono para dous festivais? Un situado en Galicia, outro en Portugal? Si, parece que si. En 2017 dous festivais, con algunha que outra afinidade, como son o Sinsal Son Estrella Galicia (21-23 xullo, Illa de San Simón, Redondela, Galicia) e o Milhões de Festa (20-23 xullo, Barcelos, Portugal) poñen en marcha un bono conxunto. Un novo abono que permite combinar, a un e outro lado do Miño, dous dos festivais de música con máis prestixio na península. O abono Sinsal Son Estrela Galicia-Milhões de Festa permitirá asistir o venres 21 aos dous eventos e o sábado 22 á cita de Barcelos.

Non se poden agachar as afinidades entre as dúas citas. No caso de Sinsal Son Estrella Galicia, os seus directores Julio Gómez e Luis Campos, sinalaron en moitas ocasións que o cartel e a filosofía do festival de San Simón teñen un “alma xemelga” en Barcelos. O Milhões de Festa, promovido por Lovers & Lollypops desde 2006, cunha dimensión e concorrencia considerablemente maiores que a do festival galego -ao redor de cinco mil persoas por día-, comparte con este referencias musicais de todo o mundo e gusto por diferentes linguaxes artísticas. Así mesmo, en ambas citas, o elemento acuático é definitorio. Na Illa de San Simón, o mar da Ría de Vigo; en Barcelos, a piscina, espazo central da música ao vivo no Milhões .

Os equipos dos dous festivais, tras un tempo falando de trascender a alianza natural e promover iniciativas conxuntas, dan o primeiro paso en 2017. Os obxectivos: sumar conexións entre as escenas musicais galega e portuguesa e constituír esta área de libre circulación festivaleira na que un mesmo bono permite a visita a dous eventos que distan 115 quilómetros entre si, aproximadamente. Haberá palco Milhões na illa de San Simón e palco Sinsal en Barcelos.

Aquelas persoas que o adquiran poderán disfrutar dos concertos diurnos que propón Sinsal Son Estrella Galicia para o venres 21 de xullo (a xornada remata ao redor das dez da noite), con cartel secreto até desembarcar na illa; retomar a música en directo esa mesma xornada no Milhões e acceder ao festival de Barcelos na xornada do sábado 22 de xullo. O abono, con cupo limitado e cun prezo inicial de 55 euros, permite o campismo gratuíto durante as dúas noites no Milhões de Festa, de acordo coas normas do festival.

A colaboración arrancou oficialmente este 31 de marzo coa actuación de The Partisan Seed (Portugal) no Sinsal Anecoico que se desenvolve na Escola de Telecomunicacións da Universidade de Vigo.

Abono Sinsal a Milhões

Abono 2 días Sinsal Son Estrella Galicia (Illa de San Simón, Redondela, Galicia) + Milhões de Festa (Barcelos, Portugal). Acceso aos dous festivais o venres 21 e acceso a Milhões sábado 22. 55 euros. A partir do 07/07: 65.
Cupo limitado
Até 16 anos (incluídos): 14 euros. A partir do 07/07, 16. Cupo limitado
Á venda en ticketea.com
O abono de dous días Sinsal Son Estrella Galicia e Milhões de Festa inclúe o barco ida e volta á Illa de San Simón o venres 21 e o transporte de ida a Barcelos ese mesmo día desde o Centro de Interpretación de Meirande (Redondela) ás 22:45. O acceso a Milhões de Festa inclúe campismo gratuíto durante venres e sábado.